• O municipio galego acolle a presentación do proxecto Ruagua, unha iniciativa coordinada polo Consorcio de Augas de Valdeorras, AquaOurense e Cetaqua co impulso da Fundación Cotec
   

• Ruagua aposta pola economía circular a través do mellor aproveitamento dos recursos auga-enerxía residuos

A Rúa acolleu o evento de presentación do proxecto Ruagua no Centro Cultural Avenida, ao que asistiron máis dun centenar de veciños do municipio. 

Ruagua, proxecto de innovación coordinado polo Consorcio de Augas de Valdeorras, AquaOurense e Cetaqua Galicia, é unha das tres propostas gañadoras do Proxecto DEMOS, iniciativa impulsada pola Fundación Cotec en colaboración con IKEA. 

Un proxecto que aposta pola economía circular na Rúa a través dun mellor aproveitamento dos recursos auga-enerxía-residuos, establecendo un modelo de simbiose rural-industrial replicable.

A cidadanía, protagonista do evento de presentación de Ruagua

O acto convidou á cidadanía de A Rúa a compartir as súas inquietudes respecto ao estrés hídrico que sofre o municipio e a explicar de que forma Ruagua pode mellorar esta problemática desde a perspectiva de actores de interese como  Asociacións de Veciños do municipio, a DO de Valdeorras e o colexio Manuel Espiño.

O evento estivo presidido por César Fernandez, vicepresidente segundo da Deputación provincial, quen sinalou que Ruagua “é un modelo do que aprender” destacando como “iniciativas do rural poden ser un modelo para as cidades e outras contornas”.

A circularidade, eixo principal do proxecto

“O proxecto achegará o uso da auga rexenerada en todos os sectores produtivos e servizos públicos dunha forma integral, dixital e áxil, promovendo a sustentabilidade e garantindo a dispoñibilidade de auga durante épocas de seca”, declaraba Teresa Alvariño, xerente de Cetaqua Galicia. 

Este recurso hídrico alternativo utilizarase no propio municipio para preservar as actividades económicas predominantes, entre as que destaca a produción vitivinícola. Ademais, permitirá favorecer a saúde ambiental da contorna a través da rega de zonas verdes, parques e xardíns, a protección do caudal ecolóxico das masas de auga, así como o coidado da biodiversidade e a protección dos núcleos habitados. Todo iso, a través de infraestruturas que faciliten a prevención e  extinción de incendios, axudando a reducir o estrés hídrico que sofre o municipio.

“Hai que tratar a auga con conciencia, é unha obrigación que temos non só como administración, senón como sociedade e iso implica tamén mirar a auga de forma diferente a como a mirabamos estes anos”, destacaba a alcaldesa María González Albert, facendo referencia á auga rexenerada.

En canto aos eixos residuos-enerxía, Ruagua fomentará o residuo cero e diminuirá o uso de fertilizantes e químicos, ofrecendo un compost de alta calidade. Do mesmo xeito, impulsará a produción de enerxía solar como fonte renovable, reducindo así as emisións de gases de efecto invernadoiro. 

Colaboración e alianza público privada, claves do éxito de Ruagua

Ruagua conta co traballo conxunto de desenvolvemento e medición da Fundación COTEC, ademais da participación de todos os actores locais interesados na reutilización e co-gobernanza da auga. 

Este proxecto forma parte de DEMOS, unha iniciativa da Fundación Cotec que aspira a demostrar o valor real e o impacto, positivo ou negativo de 3 proxectos sistémicos de economía circular en 3 comunidades rurais de España. A presidenta da Fundación COTEC, Cristina Garmendia, explicou que: "O obxectivo é xerar evidencias para facilitar a futura toma de decisións noutros lugares e noutras escalas, a nivel político, industrial e comunitario, poñendo no centro o impacto que xera na comunidade". Nas súas palabras engadiu que: "Por iso, todo o que suceda na Rúa no marco deste proxecto é tan importante: a análise e as conclusións deste demostrador servirán para replicar, escalar e mellorar a innovación, a economía circular e a vida noutros municipios e rexións de España".

O proxecto é unha mostra da alianza público privada entre a administración; co apoio do Concello da Rúa e a Deputación de Ourense; o sector vitivinícola, coa participación de D.O. Valdeorras; o sector turístico, co roteiro do Viño de Valdeorras; a empresa privada, da man de Aquaourense; o centro tecnolóxico da auga, Cetaqua; os servizos públicos, como o Consorcio Provincial contra incendios e salvamento de Ourense;  e os habitantes da Rúa.

Pola súa banda, Nurettin Acar, CEO de Ikea España, agradeceu ao equipo de persoas que fan de Ruagua unha realidade destacando que “a circularidade é moi importante para Ikea e grazas ao Plan Allen e á Fundación COTEC conseguimos facer máis grande este compromiso de cubrir a demanda de auga de forma sostible”.

O Plan Allen é unha iniciativa de IKEA para contribuír á recuperación da economía e a sociedade española. O seu principal obxectivo é crear emprego e promover a xeración dun desenvolvemento sostible. O Plan Allen desenvolverase entre 2022 e 2025. Ademais de COTEC, forman parte do Plan Allen outras tres entidades: WWF, FADEMUR/FADEMUR e ASHOKA.