Viaqua implanta a atención telefónica en 15 idiomas, vídeo atención por lingua de signos e canle de WhatsApp

Viaqua, empresa galega que xestiona o ciclo integral da auga en preto de 50 municipios galegos, amplía os seus servizos de atención ao cliente coa incorporación do servizo de atención telefónica con intérprete en 15 novos idiomas, a videochamada con lingua de signos, que xa estaba dispoñible nas principais oficinas, e a canle de WhatsApp. Estas medidas forman parte do programa ‘Viaqua Contigo’, a aposta da compañía para ofrecer o mellor servizo situando ás persoas no centro da actividade. Para iso, Viaqua puxo ao dispor da cidadanía unha atención multicanle que se adapta ás necesidades de cada cliente, ofrecendo unha atención personalizada, inclusiva, áxil e profesional para non deixar a ninguén atrás e que agora se ve reforzada.

Para solicitar o tipo de atención, o usuario pode facelo ao concertar a cita previa a través da web da compañía. Esta medida pon en valor a inclusión das persoas xa que ten en conta todas as posibles situacións de vulnerabilidade.

Viaqua está implementando distintas medidas para reforzar e consolidar os seus servizos de atención ao cliente para todos os públicos, como medidas para actuar ante as barreiras de comprensión, a concesionaria despregou a atención en 15 idiomas para garantir a inclusión de persoas inmigrantes que non entendan o galego nin o castelán. Fronte ás barreiras ligadas a discapacidades auditivas, implementouse o servizo de vídeo atención por lingua de signos, que xa estaba dispoñible nas principais oficinas en colaboración coa Federación de Asociacións de Persoas Xordas de Galicia (FAXPG), así como o uso da canle de WhatsApp, permitindo ás persoas xordas ter unha atención máis áxil. Para as barreiras ligadas á dixitalización, ademais de seguir contando coas oficinas presenciais, facilítanse as xestións en nome doutras persoas, así como o envío e recepción de documentación en papel. Por último, para situacións de vulnerabilidade económica, o obxectivo é asegurar que as persoas que non poden facer fronte ao pago do servizo coñezan as axudas e facilidades de pago dispoñibles para axudarlles a xestionar a súa situación: tarifas e fondos sociais, pago fraccionado da factura, aprazamento e fraccionamento de débeda sen intereses, entre outras medidas.

Froito deste traballo, a Asociación para o Desenvolvemento da Experiencia de Cliente (DEC), acaba de galardoar a Viaqua co premio á Mellor Estratexia en Experiencia de Cliente por Contigo, que puxo en valor a inclusión das persoas en situación de vulnerabilidade.