Viaqua e a súa fundación, Fundación Aquae, organizan o certame nacional da XXIII edición do Stockholm Junior Water Prize (SJWP), unha competición que ofrece aos mozos de todo o planeta a posibilidade de presentar proxectos de investigación sobre o binomio auga e sustentabilidade. O gañador da final española competirá no mes de agosto polo título internacional en Estocolmo.

En 2018, dous estudantes ourensáns de Primeiro de Bacharelato gañaron o certame nacional de SJWP cun proxecto consistente nun innovador sistema ecolóxico para degradar as toallitas hixiénicas.

Estes dous alumnos do colexio Marista Santa María de Ourense puideron comprobar de primeira man como a problemática das  toallitas está a afectar á rede de saneamento desta cidade nunha visita guiada, por traballadores de  Viaqua, ás instalacións do bombeo do Couto.  Viaqua, como empresa experta en auga e sustentabilidade, tamén estivo presente durante todo o proceso de desenvolvemento do proxecto, solucionando algunhas das súas dúbidas e apoiándoos na recta final do concurso.

A edición mundial deste premio de investigación xuvenil, que cada ano recibe máis de 10.000 traballos procedentes de 30 países, está promovida polo Instituto Internacional da auga de Estocolmo (SIWI). O seu obxectivo é fomentar o interese dos mozos e promover a súa creatividade en torno á auga e o medio ambiente.

Alumnos e alumnas que cursen Secundaria, Bacharelato ou Formación Profesional en calquera centro educativo de España e que en agosto deste ano teñan entre 16 e 21 anos poden participar no certame nacional de SJWP a partir do 28 de xaneiro e ata o 8 de abril. As candidaturas cos proxectos poden ser individuais ou estar conformadas por equipos de ata dous estudantes. Cada proxecto debe ter un titor/a (profesor/a de o mesmo centro educativo que presenta a investigación).

A participación está aberta a calquera proxecto de investigación escolar cuxo tema central sexa a auga e, especialmente, a xestión dos recursos  hídricos; a protección da auga; e o tratamento de augas, xa sexan potables ou residuais. Todos os traballos deben estar orientados á mellora da calidade de vida da sociedade e obter resultados concretos. Desde o punto de vista metodolóxico, os traballos teñen que ser investigacións escolares baseadas na experimentación científica, o desenvolvemento de tecnoloxías ou investigacións de carácter social.